मलकापूर (बुलढाणा) | प्रतिनिधी
मलकापूर तालुक्यातील शिराढोण गावातून एक 20 वर्षीय युवती अचानक बेपत्ता झाल्याची घटना समोर आली असून याबाबत मलकापूर ग्रामीण पोलिस ठाण्यात मिसिंगची नोंद करण्यात आली आहे. सदर युवती घरातून कोणालाही काहीही न सांगता निघून गेल्याने कुटुंबीयांमध्ये चिंतेचे वातावरण पसरले आहे.
मिळालेल्या माहितीनुसार, संबंधित युवती नेहमीप्रमाणे घराबाहेर पडली होती; मात्र बराच वेळ होऊनही ती घरी परतली नाही. नातेवाईक व ओळखीच्या ठिकाणी शोध घेऊनही तिचा काहीच थांगपत्ता लागला नाही. अखेर कुटुंबीयांनी मलकापूर ग्रामीण पोलिस ठाण्यात धाव घेत बेपत्ता असल्याची तक्रार दाखल केली.
पोलिसांनी तक्रार नोंदवून युवतीचा शोध सुरू केला असून तिच्या नातेवाईक, मित्रमंडळी तसेच संभाव्य ठिकाणांवर चौकशी करण्यात येत आहे. परिसरातील सीसीटीव्ही फुटेज तपासण्याचे कामही सुरू असल्याची माहिती पोलिसांकडून देण्यात आली.
दरम्यान, सदर युवतीबाबत कोणाला काही माहिती असल्यास मलकापूर ग्रामीण पोलिस ठाण्याशी संपर्क साधण्याचे आवाहन पोलिसांनी केले आहे. पुढील तपास सुरू असून या प्रकरणाकडे नागरिकांचे लक्ष वेधले जात आहे.
टिप्पणी पोस्ट करा